අභූත චෝදනා එපා - ජෝන්

තමන් පාතාලයට සම්බන්ධ බවට ආදී වශයෙන් චෝදනා කරන විමල් වීරවංශ, ඩිලාන් පෙරේරා, තිලංග සුමතිපාල, ප්‍රසන්න රණතුංග, ඇතුළු හිටපු මැති ඇමතිවරුන් සියලූ දෙනාට එරෙහිව මුල්‍ය අපරාධ විමර්ශන කොට්ඨාශයේ පැමිණිලි විභාග වෙමින් තිබෙන බව ජෝන් අමරතුංග ඇමතිවරයා කීවේය. එම මුල්‍ය විමර්ශන කොට්ඨාශය තමන් යටතේ පැවතීම මෙම චෝදනා වලට හේතුව බවද ඔහු පැවසීය.

මොවුන් කුමන චෝදනා කළත් ලබන 17 වැනිදාව එජාපය අනිවාර්යයෙන් ජයගන්නා බව කී ඇමතිවරයා රනිල් වික්‍රමසිංහ මහතා අගමැති ධුරයට පත්වීම කිසිවෙකුටත් වැළැක්විය නොහැකි බව ද ප්‍රකාශ කළේය.

මෙවර ගම්පහ දිස්ත්‍රික්කයෙන් එක්සත් ජනතා නිදහස් සන්ධානයට ආසන 5කට වඩා හිමි නොවන බව කී ඇමතිවරයා එක්සත් ජාතික පෙරමුණට ආසන 10ත් 11ත් අතර ප්‍රමාණයක් ලැබෙනු ඇති බව සමීක්ෂණවලින් අනාවරණය වී ඇතැයි ද කියා සිටියේය.