සුසිල් ගැහුවේ ඩබල් ගෙම්ද ට්‍රිබල් ගෙම්ද අපි දන්නේ නැ

එක්සත් ජනතා නිදහස් සන්ධානයේ හිටපු ලේකම් සුසිල් ප්‍රේමජයන්ත මහතා යහපාලන ආණ්ඩුවේ ඇමැතිකම් ගැනීමට යතියි ආරංචි වූ බවත්, මැතිවරණයේ දී ඔහු ගැසුවේ ඩබල් ගේම් එකක්ද නැතහොත් ට්‍රිබල් ගේම් එකක්දැයි නොදන්නා

බවත් හිටපු ඇමැති විමල් වීරවංශ මහතා අද (24) නාරාහේන්පිට අභයාරාමයේ පැවැති මාධ්‍ය සාකච්ඡාවක දී මාධ්‍යවේදියකු නැගූ පැනයකට පිළිතුරු දෙමින් කීවේය.

සන්ධාන ජාතික ලැයිස්තුවෙන් අසාධාරණයක් වී ඇති නමුත් තමන් සන්ධානයේ විධායක සභාවේ නැති නිසා නීතිමය පියවර ගැනීමට නොහැකි බවත්, විධායක සභාවේ ඉන්නා පක්ෂ ඒ වෙනුවෙන් කටයුතු කරනු ඇති බවත් වීරවංශ මහතා පැවසීය.

මාධ්‍ය සාකච්ඡාවේ දී අදහස් දැක්වූ වාසුදේව නානායක්කාර මහතා -

සන්ධානය බලයට ඒම වැළැක්වුවේ මෛත්‍රීපාල සිරිසේන ජනපති. සන්ධානය දිනවනවා කිව්ව මෛත්‍රී සන්ධානයේ පරාජයට කටයුතු කළා. සන්ධාන ජාතික ලැයිස්තුවත් අද ලෝක අපවාදයට ලක් වෙලා. මෛත්‍රීපාල සිරිසේන විනය පොල්ල දාලා ශ්‍රීලනිප මන්ත්‍රීවරුන් මෙල්ල කර ගන්න හදනවා. මන්ත්‍රීවරුන්ගේ හෘද්දය සාක්කිය අනුව වැඩ කිරීම විනය පොල්ලෙන් නවත්වන්න හදනවා. එය අපි හෙළා දකිනවා.

විමල් වීරවංශ මහතා -

‘මෑත ඉතිහාසයේ හොඳම ශක්තිමත්ම විපක්ෂයයි අද බිහිවෙලා තියෙන්නේ. සමහර දිස්ත්‍රික්වල මැතිවරණ ප්‍රතිඵලවල ගැටළු තිබෙනවා. ඒවා අධ්‍යයනය කළ ඉදිරියේ ඉදිරිපත් කිරීමට බලාපොරොත්තු වෙනවා. අද හවුල් ආණ්ඩු හදන්න යනවා. එක්සත් ජාතික පක්ෂයට මිනිස්සු ඡන්දය දුන්නේ එජාප ආණ්ඩුවක් හදන්න මිසක් හවුල් ආණ්ඩුවක් හදන්න නොවයි. සන්ධානයට ඡන්දය දුන්නෙත් සන්ධාන ආණ්ඩුවක් හදන්න මිසක් හවුල් ආණ්ඩු හදන්න නොවෙයි.

වස බෝතල පෙන්නපු ඩිලාන් පෙරේරලට මේ හවුල් ආණ්ඩුවේ ඉන්න පුළුවන්ද? ඔවුන් එක්ක රනිල් වික්‍රමසිංහට ඉන්න පුළුවන්ද?

අපි මේ හවුල් ආණ්ඩුවට සම්බන්ධ වෙන්නේ නෑ. විරුද්ධ පක්ෂය හීලෑ කර ගැනීමකුයි මේ ජාතික ආණ්ඩුවක් කියා කරන්නේ. මෙය ජාතික ආණ්ඩුවක් නොවේ. හවුල් ආණ්ඩුවක්. මොවුන් මේ ඉටු කරන්නේ අධිරාජ්‍යවාදී කොන්ත්‍රාත්තුවක්.

උදය ගම්මන්පිල මහතා -

සන්ධානය කිව්වේ අනාගතයට සහතිකයක් කියලයි. එජාපය කිව්වේ මාස හැටකින් අලුත් රටක් කියලයි. දැන් මේ අයගේ තේමාව තමයි ‘රටම කතත් අපි හවුලේ කමු‘ කියන එකයි.

දෙමළ ජාතික සන්ධානයේ නාකයාව අද පිළිගන්නේ ඉන්දියාවේ විතරයි. ඔහුට වෙනත් රටවල නායකයන් හමුවෙන්න බැහැ. මේ වැඩෙක් කරන්න හදන්නේ දෙමළ ජාතික සන්ධානයේ නායකයා විපක්ෂ නායක කරන එකයි. එයින් ඔහුට පිළිගැනීමක් ලැබෙනවා. විපක්ෂ නායක කියන්නේ ඊළඟ අගමැති කියා කියමනක් තිබෙනවා.

මාධ්‍යවේදියෙක් - ඡන්දෙට කළින් කිව්වා නේද ලක්ෂ 58 ඒ විදියටම තිබෙන බව. කෝ ඒ ලක්ෂ 58? මැතිවරණය ළං වෙලා මෛත්‍රීපාල සිරිසේන කළ දේවල් වලින් ලක්ෂ 10ක් අඩු වෙලා. ලක්ෂ 10ක් අඩු වෙලා බේරුණු එක ගැන සතුටු වෙන්න ඕනෑ.

ප්‍රශ්නය - මහින්ද රාජපක්ෂ රෑට රෑට මෛත්‍රීපාල සිරිසේන ජනපති සමග සාකච්ඡා කරනවා නේද? ඊයේ රෑ හමුවෙලා තිබෙනවා. මීට කළිනුත් හමුවුණානේ. ශ්‍රීලනිපයේ නායකයා ජනපති නිසා මහින්ද මහත්තයාට හමුවෙන්න වෙනවා.

ප්‍රශ්නය - විපක්ෂ නායක ලෙස යෝජනා කරන්නේ කවුද? ඒ ගැන සාකච්ඡා යනවා. තවම අවසන් නෑ. තවම වතුර බොරයි. පැහැදිලි නෑ. සැප්තැම්බර පළමු වැනි දා වෙද්දි දිය පැහැදිලි වෙයි.

ප්‍රශ්නය - විපක්ෂ නායකකමට ඔබ යෝජනා කර තිබෙනවාද? කවුරුන් හෝ යෝජනා කළොත් බාර ගන්නවාද? පිළිතුර (විමල් වීරවංශ)- මාව කවුරුත් යෝජනා කරලත් නෑ. මං ඉල්ලත් නෑ. තවත් ලෙඩක් දන්න යනවා.

ප්‍රශ්නය - මහින්ද රාජපක්ෂ කිව්වා නේද විපක්ෂ නායකකම එපා කියා? එතුමා එහෙම කිව්වට වැඩිදෙනකුගේ ඉල්ලීම තිබෙනවා නම් බාර ගනියි

ප්‍රශ්නය - සන්ධානයෙන් ශ්‍රීලනිපය ඉවත් වුණොත් ඊළඟ පළාත් පාලන මැතිවරණයේ දි මොනවා වෙයිද? ඒ ප්‍රශ්නෙට මෙතන උත්තර දෙන්න බෑ. මීට වඩා කරුණු කියන්න බෑ.

ප්‍රශ්නය - මහින්ද රාජපක්ෂ ඊළඟට ගතයුතු පියවර මොනවාද? ඒ ගැන තීරණ යෝජනා කිහිපයක් තිබෙනවා. අපි ඒ ගැන පස්සේ කියන්නම්.

ප්‍රශ්නය - මහින්ද ඉස්සරහට දාලා නේද ඔබතුමාලා ගොඩ ගියේ? හැමෝම ගොඩ ගියේ මහින්ද නිසා තමයි. සන්ධානයේ දිනපු හැමෝම ගොඩ ගියේ මහින්ද රාජපක්ෂ නිසයි. අමරවීර ගොඩ ගියෙත් ඒ නිසා තමයි. අමරවීරගේ පෝස්ටරවල මෛත්‍රීගේ පින්තුර තිබුණේ නැහැනේ.

ප්‍රශ්නය - සුසිල් ප්‍රේමජයන්ත මහතා කෝ? ඔහු ඇමැතිකමක් ගන්න යනවා කියා ආරංචියි. සන්ධාන ලේකම් තමයි විධායක සභාව හා පක්ෂ නායකයන් කැඳවන්නේ. ඡන්දෙන් පසු ඔහු මේ දක්වා කැඳවා නැහැ.

ප්‍රශ්නය - සුසිල් ප්‍රේමජයන්ත මේ ඡන්දෙදි ඩබල් ගේම් එකක්ද ගැහුවේ? ඔහු ගැහුවේ ඩබල් ගේම් එකක්ද ත්‍රිබල් ගේම් එකක්ද කියා දන්නේ නෑ.

ප්‍රශ්නය - සන්ධානයෙන් අසාධාරණයක් වෙනවා නම් නීතිමය පියවර ගන්නවාද? අපි සන්ධානයේ විධායක සභා සාමාජිකයන් නොවෙයි. විධායක සභාවේ ඉන්න පක්ෂ ඒ ගැන නීතිමය පියවර ගනීවි.