සරසවි පුතුගේ හිසට පොල්ලකින් පහරදී පියා වස බොයි

බලන්ගොඩ පොලිස් බලප්‍රදේශයට අයත් පහළ මස්සැන්න ප්‍රදේශයේ දී පියෙකු විසින් තම පුත්‍රයාගේ හිසට පොල්ලකින් පහරදීමෙන් පසුව, ඔහු ද වස පානය කර තිබේ. මෙම සිදුවීම පසුගිය මාර්තු 4 වන දින රාත්‍රියේ සිදුවූ අතර, පසුව තුවාල ලැබූ දෙදෙනාම බරපතළ තත්ත්වයෙන් බලන්ගොඩ මුලික රෝහලට ඇතුළත් කර ඇත. පුත්‍රයාගේ තත්ත්වය බරපතළ වීම නිසා ඔහුව වැඩිදුර ප්‍රතිකාර සඳහා රත්නපුර මහ රෝහලට යොමු කර ඇත.

මෙම සිදුවීමේදී, 23 හැවිරිදි විශ්වවිද්‍යාල සිසුවෙකු වන පුත්‍රයා නිවසේ සාලයේ පරිගණක පාඩමක් කරමින් සිටියදී පියා විසින් පොල්ලකින් පහරදී ඇත. පියා සහ මව නිතර ආරවුල් ඇති කරන අය වන අතර, එදින ද පියා විසින් මවට පිහියකින් පහරදීමට උත්සාහ දරා ඇති නමුත් එය ව්‍යර්ථ වී ඇති බව පරීක්ෂණවලදී හෙළිදරව් වී තිබේ.

පියා මේ වනවිට බලන්ගොඩ මුලික රෝහලේ ප්‍රතිකාර ලබමින් සිටින අතර, බලන්ගොඩ මහෙස්ත්‍රාත් භාග්‍යයා දිල්රැක්ෂි මෙනවිය රෝහලට ගොස් ඊයේ (05) නියෝග කර තිබුණේ ඔහුව එළැඹෙන 17 වන දා දක්වා රක්ෂිත බන්ධනාගාර ගත කරන ලෙසය. ඒ අනුව පියා මේ වනවිට බන්ධනාගාර නිලධාරීන්ගේ ආරක්ෂාව යටතේ තවදුරටත් බලන්ගොඩ මුලික රෝහලේ ප්‍රතිකාර ලබමින් සිටී.

රත්නපුර අපරාධ පරීක්ෂණ නිලධාරීන් විසින් මේ වනවිට පරීක්ෂණ කටයුතු ආරම්භ කර ඇති අතර, සිද්ධිය සම්බන්ධයෙන් බලන්ගොඩ පොලීසිය වැඩිදුර පරීක්ෂණ සිදුකරයි.

මේ අතර, සිද්ධිය සම්බන්ධයෙන් අදහස් දැක්වූ තුවාල ලැබූ සරසවි සිසුවාගේ මව පවසා ඇත්තේ, "මම වෙනදාටත් විහිළුවක් කරගෙන එන්නේ. පුතේ පාඩම් කරනවා ද නිදිද කියලා ඇහුවා. සද්දයක් නෑ. මම ගෙට යනකොටම අරයා දොර මුල්ලේ ඉඳලා මගේ ඇඟට ඇන්නා. පිහිය මෙහෙම ගියේ. මම ගෙට එනකල් අපේ කාමරේ හැංඟිලා ඉඳලා තියෙන්නේ. එයා බිම වැටුණා මගේ අතේ තිබුණ පළා ටික බිමට වැටුණා. මම එළියට පැන්නා. අත තමා තුවාල වුණේ. මම ළමයා දැක්කේ නෑ. එතකොට ගොඩක් අය ඇවිත් හිටියා. එයාලා කිව්වා ලේ විලක් තියෙනවා කවුද දන්නේ නෑ කියලා. මම කිව්වා පුටුවේ ඉන්නේ නම් ළමයා කියලා. රාළහාමිලා මෙතෙන ඉන්නකොට ට්‍රොලියට දැම්මා. එතකොට මම පුතේ කිව්වහම ඇස් දෙක ඇරියා" යනුවෙනි.