සුසිල්ට - අනුරට එරෙහි නඩු නව ලේකම්වරු ඉවත්කර ගනී

ශ්‍රීලනිප වැඩබලන ලේකම් දුමින්ද දිසානායක හා සන්ධාන ලේකම් විශ්වා වර්ණපාල යන මහත්වරු හිටපු ලේකම්වරුන්වන අනුර ප්‍රියදර්ශන යාපාට හා සුසිල් ප්‍රේම්ජයන්තට එරෙහිව ගොනු කර තිබූ නඩු අද (28) ඉල්ලා අස්කර ගත්හ.

තම ධූරයන්හි කටයුතු කිරීමේදී හිටපු ලේකම්වරුන්ගෙන් කිසිදු බාධාවක් ඇති නොවීම හේතුවෙන් හා සුසිල් ප්‍රේම්ජයන්ත මහතා එම ධූරයෙන් පසුගියදා ඉල්ලා අස්වීම හේතුවෙන් නඩුව ඉල්ලා අස්කර ගන්නා බව දුමින්ද දිසානායක හා විශ්වා වර්ණපාල ලේකම්වරු අද අධිකරණයට දැනුම් දුන්නේය.

එම කරුණු සලකා බැලූ කොළඹ දිසා අධිකරණ විනිසුරු හර්ෂ සේතුංග මහතා නඩු නිෂ්ප්‍රභා කළේය.

ජනපති මෛත්‍රිපාල සිරිසේන මහතා විසින් මහ මැතිවරණයට පෙර ශ්‍රීලනිප හා සන්ධාන ලේකම්වරු ඉවත් කර වැඩබලන ලේකම්වරුන් ලෙස දුමින්ද දිසානායක හා විශ්වා වර්ණපාල යන මහත්වරු පත් කළ අතර ඔවුන් දෙදෙනා තම රාජකාරියට බාධා ඇති නොකරන ලෙස සුසිල් හා අනුරට එරෙහි වාරණ නියෝගයක් පසුගිය අගෝස්තු 14 වැනිදා ලබාගත්හ.